Liam Quaide

Cuir aithne ar Liam

Is mise Liam Quaide, an t-iarrthóir Dála leis na Daonlathaithe Sóisialta i gCorcaigh Thoir, agus is comhairleoir do Mhainistir na Corann ar Chomhairle Contae Chorcaí mé faoi láthair.

Is síceolaí cliniciúil mé a d’oibrigh ar feadh na mblianta le Foirne Meabhairshláinte Pobail d’Aosaigh agus atá anois ag obair i seirbhísí ospidéil d’othair sheachtracha. Práinn na ngéarchéimeanna aeráide agus bithéagsúlachta a mheall chun na polaitíochta mé ar an gcéad dul síos, agus creidim go tréan gur gá aird a thabhairt ar an gcomhshaol agus ar cheartas sóisialta ag an am céanna.

Tá feachtas rathúil curtha ar bun agam i gCorcaigh Thoir ó rinneadh comhairleoir díom le seirbhísí cónaithe pobail a chur ar fáil arís do dhaoine a bhfuil deacrachtaí móra agus marthanacha meabhairshláinte acu. Gheall FSS i gCorcaigh Thoir na milliúin euro a chur ar fáil mar thoradh ar an bhfeachtas sin, méid a chuirfidh ar chumas daoine a bhfuil an leibhéal is airde gátair acu a bheith ina gcónaí ina bpobal féin.

D’eagraigh mé feachtais le crainn agus fálta sceach a chosaint ar bhealach níos fearr agus le hiompar poiblí ar chaighdeán níos airde a chur ar fáil. Creidim go dteastaíonn infheistíocht agus athchóiriú mór ó sheirbhísí míchumais do dhaoine óga agus fásta.

Neartaigh an obair dheonach a rinne mé le Amnesty Éireann agus leis na Samáraigh mo luachanna agus mo thosaíochtaí pearsanta sula ndeachaigh mé leis an bpolaitíocht.

Is éard a dhéanann an pholaitíocht, dar liom féin, ná glór agus cumhacht a thabhairt do dhaoine inár sochaí a fhágtar ar lár nó a dtugtar neamhaird orthu. An dúlra a chosaint, pobail a chothú agus an geilleagar a neartú, sin iad bun agus barr an scéil, dar liom.

Tosaíochtaí Liam

• Tithíocht inacmhainne agus cearta tionóntachta níos láidre.
• Seirbhísí ardchaighdeáin, inrochtana agus cuntasacha meabhairshláinte agus míchumais.
• Gníomhú ar son na haeráide a shaibhríonn an fheirmeoireacht, a fheabhsaíonn cáilíocht an aeir agus a mhéadaíonn slándáil fuinnimh na tíre.
• An dúlra a chosaint trí reachtaíocht agus trí dhreasachtaí níos láidre.
• Forbairt phobail inbhuanaithe.
• Bainistiú cuimsitheach agus comhordaithe tuilte.
• Iompar poiblí atá i bhfad níos fearr.
• Bearta éifeachtacha luais do bhailte agus sráidbhailte.